విశాఖలో(పరవాడ) తృటిలో తప్పిన ముప్పు
కాలిబూడిదైన ఫార్మా కంపెనీ
బాంబుల్లా పేలిన రియాక్టర్లు, రసాయనాల ట్యాంకులు
గజగజ వణికిన చుట్టు పక్కల ప్రాంతాలు
పరవాడ మొత్తం కమ్ముకున్న దట్టమైన పొగలు
తీవ్ర వాయు కాలుష్యంతో నరకయాతనపడ్డ ప్రజలు
సాయంత్రం(30-05-2013) 4 నుంచి తెల్లవారి 03 గంటల దాకా చెలరేగిన మంటలు
సుమారు 60 కోట్ల మేర ఆస్తినష్టం.. తప్పిన ప్రాణనష్టం
విశాఖ పరవాడలో పెను ప్రమాదం తృటిలో తప్పింది. గ్లోకెమ్‌ ఫార్మా కంపెనీలో సాయంత్రం 4 గంటకు చెలరేగిన మంటలు తెల్లవారి 03 ప్రాంతంలో అదుపులోకి వచ్చాయి. ఫ్యాక్టరీ మొత్తం బుగ్గిపాలైంది. ఆస్తినష్టం సుమారు 60 కోట్ల మేర ఉంటుందని సమాచారం. ప్రాణనష్టం ఏమీ జరగ లేదు. అయితే.. ప్రమాదం ధాటికి చుట్టుపక్కల ప్రాంతాలు వణికిపోయాయి. విశాఖ పరవాడ ప్రాంతం(రాత్రంతా) తెల్లవారే దాకా గజగజ వణికిపోయింది. ఎప్పుడు ఏమవుతుందా అని భయం గుప్పిట్లో కాలం వెళ్లదీసారు.
ఇక్కడ స్థానికంగా ఉన్న గ్లోకెమ్‌ ఫార్మా కంపెనీలో ఒక్కసారిగా మంటలు చెలరేగడంతో... ఫ్యాక్టరీలోని అన్ని బ్లాకులు బుగ్గి పాలయ్యాయి. రసాయనాలు నిల్వ ఉంచిన వేర్‌హౌజ్ లో మొదట మంటలు చెలరేగి.. క్రమంగా ఫ్యాక్టరీ మొత్తం వ్యాపించినట్లు ప్రత్యక్ష సాక్షులు చెబుతున్నారు.కంపెనీలోని రియాక్టర్లు..రసాయనాల ట్యాంకులు బాంబుల్లా పేలాయి. వేర్‌హౌజ్‌లో కార్బోహైడ్రేడ్లు నిల్వ ఉంచడంతో వాటికి నిప్పు అంటుకుని ప్రమాద తీవ్రత మరింత పెరిగింది. ఆ ప్రాంతమంతా దట్టమైన పొగలు కమ్ముకున్నాయి. తీవ్ర వాయుకాలుష్యంతో చుట్టుపక్కల ప్రాంతాల ప్రజలు నరకయాతన పడ్డారు.
ఫ్యాక్టరీ మొత్తం తగలబడ్డాక కానీ.. మంటలు అదుపులోకి రాలేదు. సాయంత్రం నాలుగు గంటకు మొదలైన మంటలు తెల్లవారి 03 గంటల దాకా నిప్పులు కక్కాయి. గ్లోకెమ్‌లో ప్రమాదం జరగ్గానే ముందు జాగ్రత్త చర్యలుగా చుట్టుపక్కల కంపెనీలు మూసి వేశారు. భారీ స్థాయిలో రసాయనాలు నిల్వ ఉంచడం.. అందుకు తగిన జాగ్రత్తలు తీసుకోకపోవడం వల్లే ఇంత భారీ ప్రమాదం సంభవించిందని నిపుణులంటున్నారు.ప్రమాదంపై ముఖ్యమంత్రి కిరణ్, మంత్రి గంటా వెంటనే స్పందించి అధికారులను అప్రమత్తం చేశారు.
ఈ భారీ అగ్ని ప్రమాదంలో ఎలాంటి ప్రాణనష్టం లేదని జిల్లా కలెక్టర్ శేషాద్రి వెల్లడించారు. ఇలాంటి ఘటనలు పునరావృతం కాకుండా చర్యలు తీసుకుంటామన్నారు.ఈ భారీ అగ్నిప్రమాదంలో ప్రాణనష్టం ఏమీ జరగక పోవడం తో అథికారులు ఊపిరి పీల్చుకున్నారు ,ఇలాంటి ఘటనలు పునరావృతం కాకుండా చర్యలు తీసుకోవాలని సర్వత్రా కోరుకుంటున్నారు.
No comments:
Post a Comment